أداة عجيبة لترتيب شغلك ومشاريعك Asana

 في هالزمن اللي نعيشه، الواحد محتاج يرتب شغله ويدير مشاريعه بطريقة منظمة وعدلة، خاصة اللي يشتغل بروحه وعنده كذا شغلة في وقت واحد. سواء كنت تصمم أو تصنع منتجاتك بنفسك أو تدرب وتعطي دورات أو عندك متجر اونلاين أو أي بزنس ، الأمر يتطلب منك ترتيب وتنظيم مو طبيعي. وهني ييي "أسانا"، البرنامج اللي يساعدك تدير مشاريعك وترتب جدولك بأسلوب يسهل عليك الحياة.

؟ Asana شنو يعني أسانا  

أسانا، يا أصدقائي هو برنامج إدارة مشاريع يخليك تتابع شغلك وتنظم مهامك بطريقة مرتبة. واجهته سهلة الاستخدام وفيها كل الأدوات اللي تحتاجها لتقسيم مشاريعك لمهام صغيرة ومتابعتها خطوة بخطوة وأكيد في أكثر من برنامج لادارة المشاريع وكلها ممتازة، لكن أنا جربت أسانا وحبيت التعامل معه واستخدامه

هل هذا البرنامج مفيد للبزنس أو المشاريع الفردية؟

كنت أسمع عن برامج ادارة المشاريع دايما وكنت أعتقد انها خاصة للي عندهم فريق عمل، وحابين يديرون المهام لكل عضو في الفريق فهو فعلا عجيب لهذا المجال بالذات، لادارة فريق العمل

في مرة سمعت من صديقة لي انها تستخدمه لإدارة مشاريعها الخاصة وهي عملها مشابه لعملي، وتعمل لوحدها وما عندها احد يساعدها، قلت خليني أجرب و أشوف

وجربته مع بداية لويتي في رمضان، وفعلا عجييييب، أولا صارت مشاريعي أمام عيني وعارفة شنو بسوي كل يوم

ثانيا . صار عندي حماس أكبر اني انقل المهمة من قيد العمل إلى خانه تم الانتهاء، شعور يوصف

طيب، بداية خلونا نتفق اني أعشق الورقة والقلب والنوت وما استغنى عنهم، ومازال عندي النوت أو الاجندة اللي اكتب فيها كل شي

الكتابة على الورق بالنسبة لي شي مهم في تفريغ كل اللي براسي، ومهم في تثبيت ان هذا العمل بعون الله ومجهودي بيتم

بس ما افتح الاجندة كل يوم، الاجندة استخدمها اسبوعيا ، اعبيها واكتب مهامي ، وبنهاية الاسبوع احلل الايبوع اللي فات واعبي الاسبوع القادم

بعد خطوة الاجندة، اوزع مهامي في اسانا، خصوصا ان المشاريع فيها خطوات كثيرة

افتح مشروع جديد، واكتب فيه كل التفاصيل اللي بسويها من مهام وافكار

اضيف ٣ بوردات، او علامات تبويب، وهم

To Do - Doing - Done

اكتب المهام لكل خطوة مع ضرورة تحديد تاريخ نهائي لهذه المهمة في خانه To Do

كل يوم الصبح ابدأ يومي بفتح البرنامج، واتابع مهام اليوم والمهمة اللي بشتغل عليها انقلها في خانة Doing

ولم اخلص منها سواء بنفس اليوم او لها تاريخ مختلف انقلها لخانة Done

وطبعا البرنامج تقدرون تكتبون فيه بالعربي

يمكن من خلال شرحي تحسون ان الشغل وايد ، لكن وقت التنفيذ بتشوفون ان بالعكس، الموضوع بسيط وهي افكار في راسي وعالورق وبكتبها واتابعها عشان اخلص منها اسرع

وفعلا قدرت مع البرنامج اصير اكثر انتاجية

التنظيم العجيب: يعطيك أسانا فرصة ترتب أفكارك ومشاريعك بطريقة ميسرة. تقدر تخطط لكل شي

متابعة التقدم: مع أسانا، تقدر تشوف شلون مشاريعك تمشي وتقيم شغلك بنفسك. هالشي يساعدك تعرف وين تحتاج تركز أكثر

المرونة بالشغل: وين ما تكون وأي وقت، تقدر تدخل على أسانا من موبايلك أو النت وتمشي شغلك بدون مشاكل

تجربتي الشخصية

أنا كمصممة باترن ومدربة، لقيت في أسانا المعاون والساعد الصجي اللي يساعدني أدير شغلي. من اطلاق منتجاتي وادارة موقعي وترتيب مواعيد الدورات لين تنظيم وقتي لتصميم، كل شي صار أسهل. والأحلى من هذا، إني صرت أقدر أعين مواعيد نهائية لمشاريعي وأتابع تقدمي بوضوح

الخلاصة

يعني إذا كنت تدور على طريقة تخليك تنظم شغلك وتزيد إنتاجيتك، أسانا هو الحل، أو أي برنامج ادارة مشاريع ثاني. ما يفرق إذا كنت تشتغل بروحك أو مع فريق، برنامج ادارة المشاريع بيكون الداعم اللي تحتاجه لتحقق أهدافك بكل سهولة ويسر