٥ خطوات للنجاح في الدروبشيبينغ

 كل شخص منا مر عليه منتج بسعر معين ، ولقاه في موقع ثاني بسعر مختلف مع ان هو نفس المنتج، بالذات مع المواقع اللي تعمل بطريقة دروبشيبينغ

 طيب، اشلوون اقدر انجح في الدروبشيبينغ واكون مميز وما يشبهني احد

بعطيكم ٥ خطوات تساعدكم للنجاح والتميز في الدروبشيبينغ

١- تميز بمننتج حصري عندك

بتقولون اشلون ، انتوا فنانين، رسامين، مصممين، عندكم قدرة وموهبة تميزكم عن غيركم

ميز منتجاتك بتصميم من ستايلك وافكارك وخطك الخاص

٢- تأكد من جودة المورد او الموقع او المصنع اللي تتعامل معاه

لازم المنتج مايكون اي كلام ، لازم تكون جودته ترضي العميل، تخيل نفسك لو تدفع مبلغ لمنتج وتنتظرة اسبوعين اول شهر ويوصلك بجودة اقل من اللي توقعته هل راح تطلب من هذا الموقع مره ثانية؟ اكيد لا 

والعكس لو طلبت وكان المنتج جودته ترضيك بترد وتطلب منه وتكون زبون دايم ودايما تدخل وتشوف كل جديد عنده

مثل ما تحب تشتري لنفسك افضل منتج عميلك بعد يحب ان يحصل على افضل منتج او خدمه مقابل المبلغ اللي يدفعه

٣- تميز بصناعة واحدة

شنو يعني؟ بمعنى انك ما تختار منتجات كثيرة تشتت فيها العميل، ركز على صناعة وحدة

مثلا انا شخصيا تركيزي على منتجات المنزل

ممكن تركز على الادوات المكتبية

ملابس الاطفال

المنتجات الورقية

كفرات الاجهزة الالكترونية ومستلزماتها وغيرهم واللستة تطول

٤- لا تلحق الترند

احيانا الترند يكون مفيد ، لكن لو مشيت دايما عليه ممكن يخسرك وقت وجهد وعملاء، وازن بين افكارك

تابع الترند احيانا لكن لا تخليه شي اساسي في عملك

٥- خدمة العملاء

خدمة العملاء مهمة جدا، بتقول انا اشتغل بروحي ما عندي خدمة عملاء بقولك مهم جدا انك تخصص وقت للرد على الاستفسارات، انت تبيع منتج طبيعي بتوصلك اسأله خلك جاهز

الموقع اللي يورد لك المنتج عنده معلومات عن منتجك ، احفظ هالمعلومات في ملف خاص حتى تقدر ترجع لها بسهولة لان اكيد بتوصلك اسئلة عنها فخلك جاهز

حط لنفسك ربع ساعه يوميا

او ٣ ايام بالاسبوع 

تكون خاصة للرد على الاسئلة سواء اللي توصلك بالانستغرام

او الايميل

او الموقع

لو ارتاح العميل لتجربة التسوق معاك وحس بثقه وشعور بالامان، بيكون عميل دائم ويرجع يطلب منك مره ثانيه وهذا شي وايد مهم 

أتمنى هالمعلومات ساعدتكم ولو بالقليل

لتعلم الدروبشيبينغ بافضل طريقة

اشترك في الدورة

أتمنى لكم يوم سعيد