٧ نصائح لكسر الجمود الإبداعي

من منا ما يحب يكون مبدع ويفجر الأفكار العجيبة؟ بس أحياناً، لم نبي نبدع، ننصدم ان ماكو ولا فكرة راضية تطلع  

تخيلي ، كل شي جاهز حواليك، المكان هادي ومرتب، بس بعدها... صفر! ما في أي فكرة تيي بالراس، ولا تدرين شلون تبدين! 

معقولة؟ وايد مواقف صارت معاي جذي. لم أبي أشتغل وأبدع، أحس روحي غرقانه بين الأفكار.وإذا فكرت اكثر، الوضع يصير أصعب بعد... 😣 

عيل شلون نكسر هالجمود ونرد نفسنا مبدعين من جديد؟ 

اقولك اليوم على 7 حيل حتى ترجعين ابداعك وتكسرين الجمود الإبداعي 

١-تمارين التفكير الإبداعي

لو خلصت أفكارك، حاولي تكتبين فكرة وحدة على الورق ومنها يمكن تطلع معاك فكرة ثانية. خطوة بسيطة جدًا. بس مفيدة

و ممكن تسوين عصف ذهني لمدة دقائق وتكتبين كل شي يطري على بالك. لا تفكرين وايد، خلي الأفكار تطير وترسي على الورق 

بعد ما تخلصين، روحي أعمق شوي وحطي هالفكرة في خريطة ذهنية. خليها نقطة الانطلاق لأفكار ثانية تتفرع منها

٢- راجعي إلهامك

لو أنت مثلي، دايماً تدورين على شي يلهمك. ولو جمعت أفكار وايد ملهمة، لو خذيتي وقت تنظمينهم بطريقة تسهل البحث  بتلاقينهم بسهولة. مثلا عندي فولدرات لصور زهور، صور اشجار ، صور اشياء مختلفة، صور مباني قسمتهم حسب النوع

ردي للأشياء اللي جمعتيها قبل وشوفي إذا في شي يقدر يعطيك شرارة الإلهام مرة ثانية. يمكن لون أو تقنية أو حتى موضوع ينفعك في مشروعك الياي

٣- خذي لفة برة البيت

أحياناً، الحل الأفضل هو تطلعين برة وتاخذين نفس عميق. حتى لو كانت لفة صغيرة حوالين البيت اذا يسمح المكان أو داخل مول بالنسبة لنا الجو حار بالصيف. وأثناء ما أنت تمشين، دققي في كل شي حوالينك

تغير الفصول يمكن يعطيك وايد أفكار. راقبي الألوان، النباتات، حتى انعكاسات الضوء على الأرض. ولا تنسين تصورين اللي تشوفه

٤- ابحثي في أماكن غير مألوفة

أحياناً، لازم تغيرين مكان بحثك. روحي مكان ما تروحين له دايماً. خذي نظرة على كل شي حولك . ممكن تلقين إلهام لفكرتك الجديدة في أماكن ما توقعتيها أبداً. فاحرصي دايماً فتح عينك وملاحظة الأماكن الجديدة.

٥- جربي وسائل مختلفة

تجربة وسائط جديدة أو العمل بطريقة مختلفة عن المعتاد يقدر يفجر الإلهام. الحلو في هذا الموضوع إنك بتكونين أكثر استعداد للعمل بحرية وبدون توقعات، المفاجآت حلوة ولها جمال مختلف

يعني جربي وشوفي شنو تقدرين تشتغلين بدون أي قيود سواء بنوع الألوان او الاقلام او الورق. هذا بيخلي الإبداع يطلع بره وتبدين تشوفين أفكار يديدة تتفجر.

٦- غيري مكان العمل

أحياناً، مجرد تغيير المكان اللي تشتغلين فيه يساعدك تحسين بتجديد ونشاط. يعني، خذي الدفتر / النوت والقلم وروحي الحديقة ايام الجو الحلو ، أو اشتغلي في كافيه (عشقي) او بدل لا اشتغل بغرفتي اطلع للصالة واحط لي طاولة واقعد بنص البيت اشتغل. التغيير هذا يطلعك من الروتين اليومي يساعدك تحسين بالإلهام.

٧- تكرار اعمال قديمه

وأخيراً، في أوقات ما تكون عندك طاقة تسوين شي جديد. إذا حسيت جذي، روحي شوفي شغلك القديم وحاولي تعيدين خلقه بطريقة مختلفة

يمكن تغيير نوع الألوان أو تاخذين نظرة جديدة على موضوع معين. هذا يساعدك تبدعين بدون ضغط تفكير بفكرة جديدة.وطبعا في عالم الباترن ومع ادوبي الستريتور اعادة تدوير عمل قديم من اسهل وامتع المهام بالنسبة لي

هذي الأفكار يمكن تساعدك تكسرين الجمود الإبداعي وترجعين الشغف بالتصميم. مو مهم وين وشلون، المهم تستمرين تبدعين و تجربين شي جديد. وأهم شي، لا تنسين تستمتعين بالعملية!