ليش لازم تحطين حدود واضحة في شغلك كمصممة؟ (وتحمين نفسك من التعديلات المجانية!)
Jan 22, 2026
إذا كنتِ مصممة أو فنانة، أكيد مرّ عليك هذا الموقف:
عميلة تطلب تصميم مخصص…
تبدين تشتغلين بحماس… ترسمين، تختارين الألوان، تجهزين التصميم، ترجعين تغيّرين لأنه "مو نفس اللي ببالي"، تعدلين مرة، ومرتين، وثلاثة…
وبالنهاية؟
تحصلين على تقييم جميل، بس المقابل؟ أقل بكثيير من الجهد.
وتقعدين تقولين لنفسك:
"أنا اللي ما كنت واضحة من البداية"
"ما قلت لها كم تعديل مسموح"
"ما شرحت الفرق بين الجاهز والمخصص"
"نسيت أرسل ملف تسعير أصلاً…"
مو بس إنتِ، كلنا مرينا بهالدوامة.
وهني نرجع للسؤال الجوهري:
شلون نكون واضحين، محترفين، ونضمن حقوقنا بدون ما نحس بالذنب أو الإحراج؟
الجواب مو بس بـ "سعر"، الجواب في النظام.
لما يكون عندك:
- ملف تسعير واضح.
- استبيان أسئلة ترسليه للعميلة قبل لا تبدأين.
- شروط مكتوبة (حتى لو بسيطة بالإيميل).
- تنسيق لتسمية الملفات وتنظيم التسليم.
- وضوح في الفرق بين الخدمة الجاهزة والمخصصة.
وقتها، يخف الضغط.
تقل التعديلات.
ويرتفع رضا العميل، وحتى تقديره لك.
لأنك وقتها ما تصممين بس، أنتِ تديرين مشروعك باحتراف.
🎯 عشان جذي، محتوى عضويتي الشهر هذا والشهر القادم بيركز على هالنقطة بالضبط:
شلون تشتغلين كمصممة مستقلة بثقة ووضوح؟
في سلسلة مكوّنة من ٤ دروس، نغطي فيها:
- تصنيف التصميم
- تسعيرك بذكاء
- طريقة التواصل مع العميل
- وتجهيز ملفات التسليم بشكل احترافي
ومع كل درس؟ تطبيقات عملية، أمثلة من شغلي، ونماذج قابلة للاستخدام.
إذا تحسين إن شغلك الإبداعي يستاهل يتقدّم بطريقة منظمة ومربحة، هالسلسلة بتنفعك.
💛 اشتركي وخلينا نخطط، ما نرتجل.
أنت قوة ابداعية
عضوية نسائية للمبدعات الفنانات اللي تحب يكون عندها عمل ودخل اونلاين من فنها
ابق على تواصل معنا
سجل بريدك الالكتروني لتصلك معلومات وفوائد عن هذا العالم الابداعي الجميل
