ما هو التصميم في كوليكشن؟

دايما نسمع من المصممين حولنا انهم شغالين على كوليكشن ملابس مثلا

او من المحلات انهم بينزلون كوليكشن الصيف

طيب شنو هو الكوليكشن!

معنى الكوليكشن هي التصميم في مجموعات

بتسألين شنو يعني مجموعات

عشان ابسط الفكرة باخذكم معاي جولة في السوق ونتعرف على معنى التصميم في مجموعات او كوليكشن

في الصورة الي تشوفونها صورتها في محل دبنهامز

كوليشكن اطفال

ليش قلت كوليكشن؟ 

لاحظو التصاميم الي بالصورة لها نفس الروح والالوان وبنقوش مختلفة لكن متناسقه مع بعض

كم باترن بالصورة؟

 كم لون بالصورة؟

كم رسمة بالصورة؟

كلها عناصر تكمل بعض عشان تخلق كوليكشن متناسق متماسك ويظهر بشكل مشوق 

اذا بشتري من هالملابس لبنتي 

بختار الفستان الي قماشه باترن، واحط معاه الجاكيت الساده الي فيه رسمه وحدة بس مع الصندل من نفس الالوان

جذي انا لبستها من كوليكشن واحد شكله مرتب وحلو

خلونا نقيس الموضوع على منتجات المنزل

تشوفون بالصورة صور لكوشيات

لاحظو الصورة الاولى

كوشية من ورد ملون صورة وليس باترن ومكملتها كوشيه ثانيه باترن بنقش بسيط من نفس الالوان حتى يكونون سيت كوشيات حلو يزين الصوفا ويعطي لمسة اناقة

الصورة الثانية

كوشية نفس الفكرة بس الاثنين باترن وكل باترن مختلف عن الثاني لكن نفس الستايل الأشكال الهندسية ونفس الالوان والروح فعطتني سيت كوشيات حلو

وممكن يكون سيت من نقش وألوان سادة مثل الي تشوفونه 

هل لازم يكون نفس الستايل بالضبط؟

لا 

لاحظو سيت الكوشيات الي سويتها لبيتي

الاولى صور شبابيك

الثانية طابوق

الثالثه ورد توليب

شنو الي يجمعهم؟ 

١- القصة وترابط العناصر

٢- الالوان

٣- نوعية الرسم

وهذا بشكل عام معنى الكوليكشن

اتمنى المعلومات هذي تفيدكم ولو عندكم اي سؤال 

 لا تترددين بمراسلتي على

[email protected]