كيف كانت بداية مشروعي؟
Dec 04, 2023
اكتوبر ٢٠٢١
ابدت الحكاية
بعد سنه ونص عمل على البزنس
حددت موعد اطلاق موقعي تاريخ ٢٠ / ١٠ / ٢٠٢١
ولان محد كان عارف باللي اشتغل عليه
قررت اسوي شغله حلوه منها هديه ومنها اعلان بطريقة لطيفة و مختلفة
استغليت مناسبة ولادة في العايله وقررت اني اصمم لها قماش باسمها واسوي منه بلانكيت ومهادات
اول تصميم كان على اسمها وبعض عبارات تقريبا تنذكر في كل بيت كويتي
الثاني اسم البنوته واسامي الدلع اللي ينادونها فيها
الثالث كان الاسم بالانجليزي بتصميم الارنب اللي اساسا كان من ضمن كوليكشن الكوالا اللي كلكم تعرفونه
طلبت الاقمشة على قماش بلانكيت Minky
وقماش سترتش للمهادات
خيطته كله بنفسي مع ان مالي بالخياطة كان تحدي كبير بس الحمدلله عدت على خير مع بعض الاخطاء😅
حاولت اعمل تغليف حلو ماضبط الا اني الفه بقماش ابيض وهو القطع الزايده من قماش المهادات الاطراف كانت بيضا قررت استخدمها
حطيتهم بسله بسيطة وبالاخر ضفت لعبة صغيرونه تعطي لمسة حلوة
رزت الوالده مع اهلي وهناك عطيتها الهدية وطلبت منها انها تفتحها جدام كل الحضور
وهني سمعت الصرخات والضحكات والتعليقات على التصاميم والعبارات اللي كتبتها لها
وقالولي من وين طالبته
وبهاللحظة قلت
انا اللي صممته
بس محد فهمني😂
يقولون لي ايه يعني انت اللي قلتيهم يسوون لج هالفكرة
قلت لا ! انا اللي رسمت
وانا اللي صممت
وانا اللي طلبت القماش
وانا اللي خيطت البلانكيت والمهادات
وبهالمناسبه احب اعلن لكم عن بداية مشروعي
في تصميم الاقمشة وورق الجدران
وبنفس اليوم صار موقعي لايف
وحساب الانستغرام بدا ينتشر
المضحك ان
الكل تحمس وقاموا ينشرون حسابي بين معارفهم
لكن
بعدهم مو مستوعبين شنو عملي بالضبط
شنو اللي اسويه واقدمه وابيعه
وشرحت اكثر من مره
وبعد فتره استوعبوا الفكرة الحمدلله
وكان هذا اليوم يوم انطلاق مشروعي
كانت لحظة حلوة ما انساها
لحد اليوم هي ذكرى حلوة جدا
اتمنى تكون عجبتكم بدايتي
ويارب بدايتكم تكون احلى واحلى
--------------------------------------------------------------
