كيف تبنين علامتك التجارية الشخصية كمصممة؟ خطوات واقعية لتسويق نفسك بثقة

 إذا كنتِ مصممة – سواء باترن، أو جرافيك، أو منتجات رقمية – فشغلك لحاله ما يكفي.

حتى لو كان جميل، حتى لو الناس تحبّه…

لازم صوتك وشغلك يبين للجمهور، أسلوبك يُعرف، وتخلين الناس يميزونك من بين الكل.

وهني ايي دور: “العلامة التجارية الشخصية”

مو بس شعار أو ألوان، لا، هي أسلوب، نبرة، قيم، طاقة…

والمقال هذا يساعدك تخطين أول خطواتك بثقة:

١. قرري: شنو تبين الناس تحس لما يشوفونك؟

هل تبين يحسون بالدفء؟ الإلهام؟ الواقعية؟ الهدوء؟ الجرأة؟

كل قرار من هذا راح ينعكس على صورك، كلماتك، تصاميمك.

مثال: لو تبين الناس تحس إنك “قريبة وسلسة”، ما تستخدمين عبارات رسمية أو صور معقدة.

٢. اختاري ألوانك وخطوطك

مو لازم تصيرين خبيرة تصميم براند.

لكن اختاري:

•   ألوان تمثل إحساسك

•   خطوط سهلة القراءة، تعبر عنك

•   وكرريها في كل مكان (بوست، موقع، ملف، منتج…)

الاستمرارية تبني الثقة.

٣. احكي قصتك… مو بس تعرضين شغلك

الناس ترتبط بالبشر، مو بالملفات.

شاركي:

•   ليش بدأتي؟

•   شنو تحبين ترسمين؟

•   شنو أهم قيمة تؤمنين فيها كمصممة؟

القصة تفرق، وتخلي شغلك ينباع مو لأنّه “حلو” بس، بل لأنه “أنتِ”.

٤. نظّمي حضورك الرقمي

وجودك الرقمي لازم يوضح شغفك وشغلك بوضوح، مثل:

•   إنستغرام مرتب وفيه لمستك

•   موقع بسيط أو رابط تعريفي (Bio) فيه معلوماتك

•   نماذج من شغلك (Portfolio) واضحة وسهلة الوصول

خلي كل منصة تقول نفس الشي: “هذي المصممة وهذا أسلوبها”.

٥. خلي كل تفاعل معك يعكسك

ردودك، أسلوب كلامك، طريقة تغليف منتجك…

كل تفصيل هو تسويق لنفسك، حتى لو ما قصدتي.

كوني حقيقية، قريبة، واضحة… هذا كافي يبني ثقة قوية مع جمهورك.

 الخلاصة:

التسويق الذاتي ما يعني تصيرين “مزعجة” أو تتكلمين عن نفسك طول الوقت

هو إنك تخلين شغلك يتكلم… من خلال صوتك، أسلوبك، وقصتك.

✨ وفي عضويتنا القوة الابداعية، بنشتغل مع بعض على بناء براندك كـ مصممة،

مو بس فن، بل هوية متكاملة تعرفين تسوّقينها، وتعيشينها

تعرفي على تفاصيل العضوية هنا