الفيمتو- قصة منتج

قصتنا اليوم فيها بطل وهو 

لحظة تولد الفكرة

مع إني أشوفه من سنين بس ما فكرت فيه الا من سنتين و أول ما طرا على بالي اني أجرب أرسمه ويكون شكل ظريف بمطبخي برمضان

بعد ما رسمته، جربت طبعته هالقماش و أغرمت فيه 😍وقررت اني أعمل منه شي مختلف مو لوحة لا شي غير

وهني اللحظة اللي تولدت فيها الفكرة

طلعت أفكار، و بدت قصة منتج منشفة المطبخ أو الشاي أو فوطة المطبخ مثل مانسميها بالكويت

وكانت البداية...

طرت على بالي فكرة الفوطة/ المنشفة وكملت معاه بعض الأكلات الرمضانية المشهورة

وجربتها وطلعت روعه، عملت منها كمية قليلة للتجربة وما توقعت الاقبال كان وااايد يحمس

وخلصت الكمية من اول اسبوع وطلبت منها بعد كمية وهم خلصت مع ان سعرها كان عالي لان تكلفتها كانت مرتفعه اساسا بحكم اني ما اطلب كميات كبيره

وفي عالم البزنس الكل يعرف كل ما طلبنا كميات كل ما قل السعر ، لكن أنا اشتغل بطريقة مختلفة

المهم الفكرة نجحت 

ثم تكبر الفكرة

وفجاة قررت أسوي منتج ثاني

قلت أجرب مفرش طاولة بس هالمرة مو رنر  لا مفرش كبير

وفعلا نفذت الفكرة بكمية قليلة جدا بس ٨ مفارش لانها مكلفة و الحجم كبير فسعر البيع مرتفع

لكن المفاجاة ان خلصت الكمية باقل من شهر

ما كان عندي وقت اني اسوي منها بعد لانها تاخذ وقت

نزلتها السنه اللي بعدها أيضا بكميات قليلة والحمدلله بعتها بالكامل

وتستمر الفكرة بالنمو 

وانا افكر واقول انزين بعد بعد شنو ممكن اطلع منه؟

 محتاجة شي مختلف بس في مجال تخصصي هالمرة عالورق

وعملت منه مفارش صحون ورقية لرمضان

وبعد بطاقات تهنئة

والحمدلله كانو أبطال رمضان ٢٠٢٣

بالنهاية حبيت أقولكم

من رسمة وحدة

شنو ممكن تطلعون منتجات

رسمة وحدة ان تحولت باترن طلعت منتجات

وان ماتحولت باترن ايضا بتطلع منتجات

لا تحصرون أنفسكم في فكرة وحدة ومنتج واحد

الفنان جدامه فرص كثيرة تقدرون تستفيدون منها كلها

شاركوني آرائكم، شنو سويتوا؟ وشنو أكثر منتج حبيتوه؟