قصة منتج - بيبي بلانكيت
Dec 14, 2023
قصة منتج - بيبي بلانكيت
من صغره وهو يحب الرياضة والحيوانات ، قضى طفولته بين الألعاب وكرة القدم ويمكن أكثر طفل استمتع بطفولته وعاشها صح ههه أعتقد محد من اخوانه لعب كثره
كان يعشق كرة القدم، مافي أبجورة بالبيت تظل أكثر من شهر
كبر هذا الطفل وصار رجل و بطل في لعبة جوجيتسو
واللعبة فيها مراحل وألوان من الأحزمة حتى يوصل لها والختام يكون بالحزام الأسود
كبر وتزوج
ولم كان ينتظر ولادة طفله حبيت أعمل له هدية مختلفة
صممت من قبل لمواليد في العايلة بلانكيت بأنواع مختلفة من أسماء وعبارات وكان التركيز فيها على الاسماء
هالمرة حبيت أعمل شيء مختلف
حبيت يكون البلانكيت بستايل الكويلت
وهذا الكويلت يحكي قصة هذا البطل
مع اضافة الاسم أكيد هالمرة دمجت الانجليزي والعربي
بعد تخطيط طويل
فكرت في استخدام الحيوانات اللي كان يحبها مع انها كثيرة بس قلت لأن مولود بختار الحيوانات الأليفة هههه
حبيت أضيف فكرة الرياضات اللي يحبها وهي
كرة القدم
والجوجيتسو
كرة القدم دخلتها في باترن كرة
و أيضا مع الحيوانات
وكنت حابة أضيف الجوجيتسو و بالذات الحزم بألوانها
هني بنتي عطتني فكرة
لأن المولود اسمه فهد
قالت لي ماما، فهد يعني Cheetah
رسمي الفهد الأبيض
وحبيت الفكرة وقلت اضافة للحيوانات اللي استخدمتها
رسمت الفهد الأبيض بأكثر من مشهد
ومنها مشهد وهو لابس لبس الجوجيتسو والحزام الأزرق، البني، البنفسجي والأسود
وزعتهم بالكويلت بالترتيب
و الاسم بالعربي كان من تصميم بنتي عدلت عليه وحبيت اني أضيفه حتى تكون مشاركة في إعداد الهدية
كل رسمة وكل مربع يحكي قصة
بعد ما خلصت من التصاميم كلها وفكرت بتوزيع الكويلت
صار وقت اني ابحث عن من ينفذ لي وفعلا لقيت حساب متابعته من زمان وتواصلت معها واتفقنا وتم العمل وطلع الجمال اللي شفتوه
بعد ولادة البيبي حبيت أضيف لمسة أخيرة وهي ليبل حق الكويلت
طبعته بتاريخ ولادة البيبي وانه هدية مني
لكن بدون تاريخ
بعد ولادته خيطت التاريخ وصار وقت اني أخيطه عالكويلت
صارت الهدية كويلت وشوية ألعاب ومهادات
وبعد
كملت طقم كامل لغرفة النوم من نفس هذا الكوليكشن
الطقم مكون من
لحاف للسرير
مخدات
ستارة
سلة ألعاب حلوة كلها من نفس التصميم
وكانت هذه الهدية نفس ما تشوفونها بالصورة
يمكن هذا أكثر عمل استمتعت وأنا اشتغل عليه
ووصل الفكرة اللي أبيها
وبعد هذا
عدلت شوي على الكولكشن وشلت الاسم واستخدمت تصميم ثاني بديل للاسم
وصار عندي كوليكشن أطفال جديد حلو البورتفوليو وأرسلته لشركات الأطفال
والحمدلله بعت الكوليكشن بعقد غير حصري لشركة بزنس أطفال في استراليا
وهذا يعني اني أقدر استخدم الكوليكشن في أكثر من مكان و أكثر من منتج
وأقدر أبيعه بعد
تعلم تصميم الباترن يفتح آفاق غير محدودة لو عرفنا اشلون نستخدمها بطريقة صح
لو كان عندنا خطة مدروسة ولو كنا فاهمين الموضوع ومتقنين التصميم
بنعرف شلون نتعامل مع تصاميمنا بذكاء
أحب أسمع رايكم باللي شفتوه
راسلوني على لايميل بانتظار ردودكم
أو من خلال الانستغرام
ولو حبيتوا تتعلمون اشلون مازال التسجيل في دورة فن تصميم الباترن مفتوح حتى يوم ٢٧ يسمبر
وباذن الله نبدأ الفصل الأول يوم ١٨ ديسمبر
لاتفوتكم الدورة
للتسجيل في دورة فن تصميم الباترن
