كيف استمر بالابداع في فترات الإجازات والمواسم البطيئة

مع استمرار الصيف، أحس ان طاقتي الإبداعية تقل و أدخل في مود الاجازة . سواء كنت مسافرة ، أو طلعة عائلية، أو في البيت مع أسرتي، فهذي لحظات هذه اللحظات كلها حياة وهدوء ، لكن أيضا فيها تشتت بالنسبة لي لان روتيني اليومي يتغير

بدل ما كانت الفترة الصباحية بالكامل لي ولعملي صار فيه تغييرات ويومي يبدأ مثل قبل. مع هذا هي مرحلة حلوة أحاول استمتع فيها مع عائلتي.

هذه الأوقات الأكثر هدوء مو بس مريحة ، هي بعد ضرورية للإبداع، شلون اقدر استفيد من هذه اللحظات واغذي خيالي،  واحفز الإبداع، وأجدد روحي و طاقتي الفنية. الإلهام مو بس من سفرة لمكان جميل أو رحلة مكلفة،  تسخير الإلهام من لحظات الحياة الأكثر هدوءا، وتحويلها إلى مصادر قوية للإبداع. سواء كان ذلك طلعة بسيطة للمول، أو لعبة بسيطة مع الأسرة، أو أصوات الطبيعة صوت العصافير في الصباح ، أقدر أحول هذه التجارب إلى أفكار!.

خلوني اخذكم معاي برحلة التعلم من الاجازات والمواسم اللي تكون فيها طاقتنا الابداعية أقل، وشلون نقدر نستفيد من كل لحظة نغذي فيها روحنا ونجمع أفكار تفيدنا حتى لو ما بنشتغل عليها الحين، ممكن بشتغل بعد سنة أو سنتين، جمع الأفكار ما يقتصر على مشروع بشتغل عليه مباشرة ، لا استفيد من وقتي بشكل يخلي مكتبتي الابداعية مليانه أفكار ووقت العمل الفعلي أفتح مكتبتي وابدأ بتحديد الفكرة.

خلال فترة الصيف إذا ما كنت مسافرة، أو إذا سافرت ورجعت، في روتين صيفي مختلف، لكن روتين الصيف غير مستقر، يعني مو كل يوم نفس اليوم اللي بعده واللي قبله، في أيام آخذ عيالي للنادي، وفي أيام تكون طلعات للمراكز التجارية والمولات بحكم جو الصيف، وفي أيام ممكن تكون للشاليه والبحر مع اني استبعد نوعا ما بالصيف لأن الحرارة شديدة جدا وما استمتع بالشاليه مع الحر.

وفي أيام نقضيها بالبيت، اما ان نشوف برنامج أو فلم مع بعض، أو نشتغل على أي مشروع يدوي للبنوتات، أو كل واحد يكون لاهي بالشي اللي يحبه.

طيب شلون أنا استفيد من هاللحظات؟ أولا الراحة مطلوبة، راحة المخ وراحة البال، في أي طلعة دايما ادور على الشغلات الجميلة اللي تجذبني وأصورها ، حرفيا أي شي يعجبني أصوره حتى لو الأرضية فيها كسر حلو أصوره هههه، أصور كل شي ومافي مشروع في بالي، المهم بنهاية الصيف عندي ألبوم صور مليان أفكار

الأفلام والمسلسلات والبرامج ، كلها أفكار قبل فترة نشرت بوست عن مسلسل مفترق طرق وذكرت عن الديكورات اللي جذبتني ، وفي أكثر من مسلسل وفلم وبرنامج وايد أفكار حلوة.

أفلام وبرامج الأطفال، ملياااانه باترن ههه ، أفكار رهيبة ، عجبتني فكرة اصورها، او اكتبها بالنوت ، برامج التصميم الداخلي والمسابقات تعطيني طاقة ابداعية قوية، خصوصا لم يكون التصميم مو ستايلي أستمتع وانا اشاهد واحلل العمل اللي جدامي

كل اللي قلته، لاحظوا ان مافي شغل، هو فقط ملاحظة الأشياء الجميلة و تسجيلها والاحتفاظ فيها لوقت الحاجة، أيضا الاستمتاع باللحظة واعطي كل شخص حقه من الاهتمام والحب وبعد أغذي نفسي معاهم

في فترة الصيف عادة ما اشتغل على تصميم جديد، يكون فيه متابعة لمشاريع قائمة ، و أحيانا أحاول أخلص المشاريع قبل الصيف، وهذه السنه تأخرت بتصميم منتجاتي لرمضان ٢٠٢٥ فقررت اني ما أوتر نفسي وحطيت لنفسي تاريخ للبدء بالتصميم وبيكون بداية سبتمبر، و بحاول اني اجهز منتجاتي الرمضانية قبل يناير ٢٠٢٥ اذا الله أراد

بما اني اشتغل لوحدي، أنا حرة نفسي وجدولي اغير فيه حسب ظروفي وحسب اللي يناسبني

والحين دورك، خبريني شلون تتعاملين مع الصيف والاجازات وشلون تتصرفين لم طاقتك الابداعية تقل 

راسليني على [email protected]